Наадмын бэлтгэл ажил дуусах шатандаа оржээ

Үндэсний их баяр наадмын  комисс өчигдөр хуралдлаа. Баяр наадмын бэлтгэл ажил 80 хувьтай үргэлжилж байна. Үлдсэн ажлыг энэ сарын 6-н гэхэд чанартай хийж гүйцэтгэх үүргийг Шадар сайд Д.Тэрбишдагвад өглөө. Наадмын нээлт, хаалтын ажиллагаа болоод төрийн хүндэтгэлийн тоглолт зэрэг нь баяр наадмын гол илэрхийлэл болдог. Тиймээс үүнд гол анхаарлаа хандуулж ажиллаж байгаа юм байна.

Монгол наадмын нээлтийн ажиллагааны найруулагч Гавьяат жүжигчин Д.Сосорбарам энэ үеэр “999 залуу “Түмэн эх”-ийг дуулж, 999 бие биелээч бүжиглэж наадам эхэлнэ. Наадмын нээлт 40 орчим минут үргэлжлэхдээ Монгол түмний үнэ цэнэ, бахархлыг төрүүлэх болно” гэж хэллээ. Наадам сурвалжлах сэтгүүлч, сурвалжлагч болон шууд дамжуулах телевизийн тоо өнгөрсөн жилийнхээс нэмэгдэж байгааг Хэвлэл мэдээлэл, сурталчилгааны салбар хороон дарга Ц.Мөнхтөр хэлээд Төв цэнгэлдэх дэх сэтгүүлчдийн байрлах талбайг өргөтгөх болон хурдан морины уралдааныг шууд дамжуулах машиныг нэмэх хүсэлт гаргалаа. Мөн Төв цэнгэлдэх хүрээлэн, Хүй долоон худагт ажиллах хэвлэлийнхэнд интернэтээр мэдээ мэдээллээ дамжуулах боломжоор хангаж ажиллана гэж хэллээ.

Төв цэнгэлдэх хүрээлэнгээс дотогш 100 метрт машин зогсоохгүй гэж цагдаагийн газраас мэдэгдэж байна. Наадамчид “Дүнжингарав”, “Мишээл ЭКСПО” төвийн хашаанд автомашинаа үнэ төлбөргүй байрлуулж, тэндээс автобусаар Төв цэнгэлдэх хүртэл үнэгүй  үйлчлүүлэх юм. Мөн 3000 машины төлбөртэй зогсоол ажиллана гэв.