"Orgiluun cup 2013" боулингийн тэмцээн маргааш эхэлнэ

Нийслэл хот байгуулагдсаны 374 жилийн ой, нийслэлийн өдрийг угтаж Улаанбаатар хотод үйл ажиллагаа явуулж байгаа аж ахуйн нэгж байгууллагуудын дунд хөдөлгөөн, эрүүл мэнд, хүн амын бие бялдрыг чийрэгжүүлэх, амралт чөлөөт цагийг зөв боловсон өнгөрүүлэх, боулингийн спортыг олон нийтэд сурталчлах зорилготой “City cup - 2013” боулингийн аварга шалгаруулах тэмцээн болох гэж байна. Монголын боулинг сонирхогчдын холбоо, Нийслэлийн засаг даргын тамгын газартай хамтран зохион байгуулж байгаа тус тэмцээн нь тав дахь жилдээ болж байгаа юм. Одоогоор тэмцээнд 40 гаруй багийн 300 гаруй тамирчид оролцохоор мэдүүлгээ өгөөд байгаа бөгөөд тэмцээний урьдчилсан шатны тоглолт энэ сарын 26-27-ны өдрүүдэд, финалын тоглолт арваннэгдүгээр сарын 2-нд “Big Bowling” төв дээр болох  ажээ. 10 сая төгрөгийн шагналын сантай тус тэмцээний нэгдүгээр байр шилжин явах цом, өргөмжлөл, алтан медаль, 3 сая төгрөг бол удаах байр цом өргөмжлөл, мөнгөн медаль, 2 сая төгрөг, гуравдугаар байр цом өргөмжлөл, хүрэл медаль 1 сая төгрөг байна. Мөн тусгай байр тавыг шалгаруулж 500 мянган төгрөгөөр урамшуулах бол шилдэг нэг тамирчныг бас шалгаруулна гэнэ. Ингээд тэмцээний зохион байгуулагчдын нэг Монголын боулинг сонирхогчдын холбооны Ерөнхий нарийн бичгийн дарга Д.Амьбөхтэй ярилцсан юм.
-Энэ удаагийн тэмцээний онцлогийг сонирхуулаач?
-Анх 2009 онд нийслэл хот байгуулагдсаны 370 жилийн ойгоор энэхүү тэмцээнийг зохион явуулж  байлаа. Түүнээс хойш жил бүр уламжлал болон явагдаад тав дахь жилтэйгээ золгож байна. Энэ  удаагийн тэмцээний онцлог нь АПУ компанитай хамтран явуулж байгаа бөгөөд тэдний шинэ бүтээгдэхүүн Монголын анхны хийжүүлсэн ус “Оргилуун” "City cup"-ийн "гол дүр" байх юм. Тиймдээ  "Оргилуун кап" нэртэйгээр явуулж байгаа юм. 

-Хичнээн баг 10 сая төгрөгийн шагналын сантай шилдгүүдийн төлөө өрсөлдөхөөр болоод байна вэ?

-Тэмцээний цар хүрээ жилээс жилд өргөжиж байна. Одоогоор урьдчилсан шатанд 40 гаруй баг оролцохоор мэдүүлгээ өгөөд байна. Энэ бямба, ням гарагуудад урьдчилсан тоглолт болж, харин 11-р сарын 2-нд шилдэг 21 баг 10 сая төгрөгийн шагналын төлөө өрсөлдөнө.
-Тэмцээний цар хүрээ жилээс жилд өргөжиж байна гэлээ. Анх 2009 онд хичнээн баг өрсөлдөж байв?
-2009 онд 30 хүрэхгүй баг оролцож байлаа. Харин энэ удаад 40 гаруй баг болсон байна. Тамирчдын оноо ч их өндөр болсон.
-Шилдгүүдийг сонирхуулаач?
-2009 онд ТЭЦ-3-ийн баг түрүүлж байлаа. Харин 2010, 2011 онуудад "Top floor" компанийн Мишээл, ноднин МСS группийн "MCS электроникс" баг  тус тус түрүүлсэн. Энэ удаад шилдгүүд маань ч өрсөлдөх бөгөөд чухам аль баг шилжин явах цомын эзэн болохыг харах л үлдээд байна.
- Монголын боулинг сонирхогчдын холбоо хэдэн онд байгуулагдсан бэ?
- Монголын боулинг сонирхогчдын холбоо байгуулагдаад тав дахь жилтэйгээ золгож байна. Манай холбооноос жилд 10 гаруй төрлийн тэмцээнийг зохион явуулдаг. Үүнд: MCS coca cola zero, боулинг тур, ахмадын болон клубын тэмцээн гэхчилэн.

-Мэдээлэл өгсөн танд баярлалаа.

П.Ундраа