"Алтан морь"-ны 6 дахь эзэн

Монголын  хурдан морины уралдааныг хөгжүүлэх үйлсэд оюун ухаан, бие сэтгэл, хөрөнгө хүчээ зориулан, ММСУХ-ны бодлого үйл ажиллагааны хүрээнд амжилттай ажиллаж, Монголын үндэсний их өв соёл хурдан морины уралдааны түүхэнд гарамгай гавьяа байгуулсан хурдан морин зүтгэлтэнд олгох “Алтан морь” шагналыг ММСУХ-ноос он солигдох торгон мөчид гардуулдаг. Тухайн жилдээ хурдан морины үйлсэд онцгой амжилт гаргасан байгууллага, иргэнд олгодог “Алтан морь”-ийг анх  Дундговь аймгийн Өлзийт сумын уугуул, “Ажнай шарга” гал уяаны уяач Б.Наранхүү авч байсан билээ. Харин удаахыг  "Арвагар хээр” МСУХ-ны гүйцэтгэх захирал Ю.Үнэнбүрэн, “Монхангай” группын Ерөнхийлөгч С.Сэргэлэн, Завхан аймгийн Яруу сумын уугуул, МУ-ын Алдарт уяач Д. Дагвадорж, Булган аймгийн Гурванбулаг сумын уугуул, МУ-ын гавьяат барилгачин, Алдарт уяач П.Мэндбаяр  нар авч байлаа. Тэгвэл 2013 оны "Алтан морь"-ны эзэн МУ-ын Тод манлай уяач Х.Бат-Эрдэнэ болсон юм.  Сүүлийн жилүүдэд тун ч одтой наадаж байгаа Тод манлай ийнхүү Монголын хурдан морины уралдааны хөгжилд оруулж буй хувь нэмрээ салбарынхандаа үнэлүүлсэн нь энэ байв.

А.Дөл