Л.Цагаандалай "Морьтны соёл"-ын тухай 10 цуврал баримтат кино, зургийн цомог бүтээжээ

Сэтгүүлч Л.Цагаандалайг бид “Адуучин” нэвтрүүлгээр нь андахгүй. Түүхч мэргэжилтэй түүний хувьд хүүхэд байхын адуунд хорхойтой нэгэн явсан. Энэ ч үүднээс нэгэн баримтат киног бүтээгээд байгаа ажээ. Тодруулбал, “Дэлхийг тамгалсан Чингисийн морьд” төслийн хүрээнд “Далай” продакшн, “Нүүдэлчдийн дуу хоолой” төрийн бус байгууллага хамтран “Морьтны соёл” 10 бүлэг цуврал баримтат кино бүтээж үзэгчдийн хүртээл болгоход бэлэн болгоод байна. Түүнчлэн “Морьтны соёл” гэрэл зургийн цомгийг монгол, англи тайлбартайгаар хэвлүүлэн гаргажээ. Уг цомгийн мялаалгын үгийг Монгол Улсын Ерөнхийлөгч Ц.Элбэгдорж  хэлсэн байна. Сэтгүүлч Л.Цагаандалайн сүүлийн хоёр жилийн хөдөлмөр, түүхчид, археологичид, эмч, судаалчид гэх мэт олон газрын уран бүтээлчид хамтран бүтээсэн энэхүү кино болон гэрэл зургийн цомгоор нүүдэлчдийн адууны соёлын эрт эдүгээ, түүний мөн чанарыг гүн гүнзгий тайлбарлажээ. 10 бүлэг киноны тухайд “Хангал сүрийг хазаарлав” нэрийн дор хазаарын тухай, ”Эмээл минь хаан ширээ” сэдвийн дор эмээлийн тухай хоёр бүлэг гэх мэт “Монгол тамга Монголын цадиг”, “Дээдсийн их сөн монгол айраг”, “Уурганы урт түүх, суран бугуйлын ид шид”, “Хүлгийн зоон дээр үлгэр амилуулсан уяачид”, “Түмний их цэнгэл монгол наадам” хүрээнд нүүдэлчдийн адууны болон морьтны соёлыг Монгол орны говь, хангай, уул, талаар буюу  21 аймгаар явж киногоо бүтээжээ. “Морьтны соёл” баримтат кино болон гэрэл зургийн цомгийн ивээн тэтгэгчээр “Таван толгой транс” компани ажилласан байна. Уг кино тун удахгүй “Эх орон” телевизээр үзэгч түмэнд хүрэх юм байна. Дашрамд дурдахад, зургийн цомгийн нээлт нь энэ сарын 30-нд болох ажээ.