“Нялгын хурд” МСУХ шилдгүүдээ тодруулжээ

2013 оны улсын шилдэг салбар Төв аймгийн Баянжаргалан сумын “Нялгын хурд” МСУХ хоёр дахь жилдээ буюу өнгөрсөн оны 12 дугаар сарын 17-нд шинэ жилийн цэнгүүнээ зохион байгуулж шилдгүүдээ тодрууллаа.
Шилдэг уяачаар: ММСУХ-ны дэд тэргүүн Цэвэгдоржийн Туваан. Тэрээр АХ-ын 93 жилийн ойн үндэсний их баяр наадамд хул шүдлэн айргийн гурав, Дундговь аймагт зохион байгуулагдсан төвийн бүсийн уралдаанд халтар соёолон айргийн тав, хул шүдлэн айргийн дөрөвт, Төв аймгийн Эрдэнэ сумын 90 жилийн ойд халтар соёолон айргийн дөрөвт, мөн Архуст сумын 55 жилийн ойд халтар азарга аман хүзүү, хонгор хязаалан айргийн гурав, хул шүдлэн болон хээр даага түрүүлгэсэн юм.
Шилдэг залуу уяачаар: Баянжаргалан сумын наадам болон Дундговь аймгийн Цагаандэлгэр сумын 90 жилийн ойд саарал шүдлэн аман хүзүү, айргийн дөрвөөр хурдлуулсан амжилтаар Пүрэвдоржийн Сугарбат
Шилдэг уралдаанчаар: Соёмбо сургуулийн тавдугаар ангийн сурагч Бямбадоржийн Бэлгүтэй. Тэрээр аав Бямбадоржийн хар даагыг унаж Баянжаргалан сумын наадамд түрүүлж, Төв аймгийн 91 жилийн ойн баяр наадамд айргийн гурав, М.Энхболдын Манлай цолны мялаалга наадамд айргийн тав, Дэлгэрцогт уулын тахилга наадамд айргийн гуравт хурдлуулсан.
Шилдэг азаргаар: Бат-Очирын Дашбаатарын хул. Хул азарга 2014 онд Баянжаргалан сум болон Төв аймгийн 91 жилийн ойн баяр наадамд айргийн дөрвөөр давхижээ.
Шилдэг их насаар: Сумын Алдарт уяач Баасанбатын хар. Энэ хурдан хүлэг Баянжаргалан суманд зохион байгуулагдсан хаврын тэргүүн сарын шинийн гуравны уралдаанд аман хүзүү, Баян сумын 90 жилийн ойд айргийн тав, Үнээ уулын тахилга наадамд айргийн дөрөвт хурдалсан байна.
Цэнгүүний үеэр Ц.Туваан, Б.Дашбаатар, Б.Саранхүү, Д.Баяндүүрэн, Г.Бямбадорж, Б.Мөнхтүвшин, М.Пүрэвдорж, Б.Мөнхпүрэв, Ж.Батсайхан нарын есөн уяачид сумын алдар цол олгосон бөгөөд тус сумын уугуул, аймаг болон улс, бүсийн наадамд уясан хурдан хүлгэдээ айрагдуулсан уяачид хүртсэнээрээ онцлог юм. 
Түүнчлэн морин жилийн босгон дээр МУ-ын Манлай уяач цол хүртсэн Галын Баттөмөр, “Нялгын хурд” баримтат киног бүтээсэн “Яндаг фильм” продакшны захирал Я.Болдбаатар, Төв аймгийн Зуунмод сумын “Цэцээ гүний хурд” МСУХ-ноос зохион байгуулсан аймгийн зүүн бүсийн наадмын үеэр Хос морьтон тэмцээнд түрүүлсэн З.Болдбаярын гэр бүл, Дундговь аймагт явагдсан төвийн бүсийн уралдаан болон Төв аймгийн зүүн бүсийн наадамд хүрэн шүдлэнгээ айрагдуулсан Б.Мөнхтүвшин, эцэг өвгөддөө зориулж босгосон “Их бодь” суварганы нэрэмжит дөрвөн насны хурдан морьдын уралдааныг дөрөв дэх жилдээ амжилттай зохион байгуулсан Б.Мөнхпүрэв, Б.Мөнхтүвшин, “Нялгын хурд” МСУХ-ны адуучин Р.Баатарцогт, уралдааны үеэр гарааны төхөөрөмжин дээр идэвхтэй ажилладаг Ч.Баяр-Очир, Б.Тэмүүлэн, нутгийн уугуул морины зүтгэлтнүүд болох Ц.Туваан, Б.Саранхүү, Б.Дашбаатар, Б.Мөнхтүвшин, Д.Баяндүүрэн нарын хурдан хүлгүүдийг уяж сойж хурдлуулдаг аймгийн Алдарт уяач Чулуун /Архуст/, Золзаяа /Эрдэнэ/, сумын Алдарт уяач Ш.Баттулга, Энхболд /Баянжаргалан/ нарт нутгийн зөвлөлөөс хүндэтгэл үзүүлж бэлэг дурсгалын зүйлс гардуулав.
Улаанбаатар хотын СУИС, Хөгжим бүжгийн дунд сургуулийг төгссөн болон суралцаж буй Баянжаргалан сумын оюутан, сурагчид урилгаар оролцож дуу хуурын эгшгээр бэлэг барьсны зэрэгцээ уяачдаа хөгжөөж азтан шалгаруулсан.
Ташуур-залуу уяач Ч.Баян-Очир
Жолоо-сумын Алдарт уяач Б.Батсайхан
Сойз-Н.Болдбаатар
Азарганы баримал-аймгийн Алдарт уяач Д.Баярсайхан
Дөрөө-залуу уяач З.Болдбаяр
Амгай-сумын Алдарт уяач Ш.Баасанбат
Супер шагнал болох “Нялгын хурд” хэмээн монгол бичгийн таталбар бүхий дурсгалын зүйл болон нэмнээ-Б.Мөнх-Пүрэв нар шагналын эзэд болсон юм.
Төв аймгийн Баянжаргалан сумын “Нялгын хурд” МСУХ-ны тэргүүн Г.Бямбадорж