Дэлхийн усны өдөр

Дэлхийн усны өдөр, нийгмийн хариуцлага-2015
Хаягдал ус цэвэршүүлэх байгууламжаа бүрэн хүчин чадлаар нь ашиглалтад оруулав
М-Си-Эс группээс байгаль орчинг хайрлан хамгаалахад анхаарч, үйл ажиллагаа явуулж буй бүхий л салбар, хүрээндээ түүнд учрах сөрөг нөлөөллийг хамгийн бага хэмжээнд байлгах, энэ чиглэлийн олон улсын болон үндэсний стандартуудыг мөрдөхийн зэрэгцээ нэн шаардлагатай асуудлыг шийдвэрлэхэд хувь нэмрээ оруулах далайцтай төсөл хөтөлбөрүүдийг санаачлан хэрэгжүүлж ирлээ.
Тухайлбал, М-Си-Эс Кока-Кола компани усны асуудалд хариуцлагатай хандах сэтгэлгээг төлөвшүүлж, үйлдвэрлэж буй 1 литр бүтээгдэхүүн тутмын усны зарцуулалтыг бууруулах чиглэлийг тууштай барьж ажиллаж байна. Энэ хүрээнд өнгөрсөн онд үйлдвэрийнхээ хаягдал усыг цэвэршүүлэн, ахуйн бус зориулалтын бүх төрлийн угаалгад ашиглаж болох нано технологиор бүтээгдсэн MBR шүүлтүүр бүхий хоногт 2000 тонн хаягдал ус цэвэршүүлэх байгууламжийг салбартаа анхлан барьж бүрэн хүчин чадлаар нь ашиглалтанд оруулав. Уг MBR шүүлтүүр нь хот төлөвлөлт, бохир ус цэвэршүүлэлт, инженерийн шугам сүлжээний шийдэлд шинээр нэвтэрсэн дэвшилтэт технологи тул “Siemens”, “Fujitsu”, “Kubota” зэрэг нэр хүндтэй компаниуд ашигладаг юм. Энэхүү хаягдал ус цэвэршүүлэх байгууламжийг барьж байгуулахад 2 сая ам.долларын хөрөнгө оруулалт шаардагджээ. Байгууламж бүрэн хүчин чадлаараа ашиглалтанд орсноор үйлдвэрийн хаягдал ус  энэ төрлийн стандартыг бүрэн дүүрэн хангаж чадсан төдийгүй загас амьдрах хэмжээнд цэвэршүүлэлт хийгдэж байна. Цэвэршүүлэлт хийгдсэн саарал усыг Улаанбаатар хотын зам талбайг угаах, ногоон байгууламжуудыг услах болон ой, хээрийн түймэр, объектын гал унтраахад зориулж Нийтийн үйлчилгээний Улаанбаатар нэгтгэл, Баянзүрх дүүргийн Онцгой байдлын хэлтэст төлбөргүй тогтмол нийлүүлж байна. Үүний үр дүнд нийслэлийн 340 мянган метр квадрат ногоон байгууламжийн усалгаа, төв талбай, гол гудамжуудын автозамын угаалганд жилдээ зарцуулдаг 70 мянган тонн цэвэр усыг хэмнэж, хотын зүүн бүсийн гал түймрийг унтраахад ашигладаг 20-40 тонн цэвэр усыг саарал усаар орлуулах боломжтой болсон юм.
Түүнчлэн тус компани нь байгаль орчны бохирдлыг бууруулахын тулд байгальд хоргүй, хөрсөнд амархан шингэдэг “Biodegradable” хогны уутыг Монгол Улсдаа анх удаа хэрэглээнд нэвтрүүлсэн бөгөөд 2009 оноос эхлэн жил бүр байгальд ээлтэй 20 мянган ширхэг уутыг байгалийн үзэсгэлэнт газрууд-Хан-Хэнтий, Горхи-Тэрэлж, Хөвсгөлийн тусгай хамгаалалттай газруудад аялж буй гадаад, дотоодын жуулчдад үнэ төлбөргүй түгээж хэвшжээ. М-Си-Эс Интернэйшнл компани нь Ухаа Худаг дахь салбарынхаа орчинг тохижуулж 540 ширхэг мод тарьж, 800 метр квадрат талбайг зүлэгжүүлж, нийт 2000 гаруй модны усалгаа, арчилгааг хийж, говь нутагт ногоон орчин бий болгохын төлөө зорьж ажиллажээ.                                                              Б.Сайхан