“Three flames” ХХК-ийн захирал Т.Хонгорзул:Монголд анх удаа размертай олон төрөлт нэмнээг үйлдвэрлэсэн

Эрхэм уншигч та бүхний эчнээ танил “Three flames” ХХК-ийн захирал Т.Хонгорзултай уулзаж, уяачид, уралдаанч хүүхдэд зориулсан бүтээгдэхүү­нүүдийнх нь талаар товч тодруулга авснаа хүргэе.
-Дахин уулзаж байгаадаа баяртай байна. Энэ удаа хурдан морины нэмнээ болон бусад хэрэгсэл, уралдаанч хүүхдийн хувцасны талаар тодруулахаар ирлээ. Хамтран ажиллаж байсан хүмүүс тань сэтгэл хангалуун байдаг юм билээ.
-Баярлалаа. Ний нуугүй хэлэхэд би морь малнаас их хол хүн. Энэ салбарт зориулсан бүтээгдэхүүн үйлдвэрлэхийн тулд эхлээд судалж мэдэх хэрэгтэй болсон. Тэгээд хурдан морины уралдаануудыг үзэж, уралдаанч хүүхдүүдээр маш их бахарсан. Монгол өв соёлоо тээж яваа тэр бяцхан хүүхдүүдийг хүйтэнд нь даруулахгүй, бороотойд норгохгүй тэгсэн хэр нь биед эвтэйхэн хувцас хэрэгтэй юм байна гэж бодоод унаач хүүхдүүдтэй ярилцсан. Ярилцах зуур хүмүүс баяр хүргээд бэлэг өгөхөөр нөгөөхийгөө хийх халаас хайгаад л... За тэгээд ямар ч байсан халаастай байх ёстой юм байна гэсэн эхний санаа төрсөн л дөө. Тэгээд ижил төрлийн бүтээгдэхүүнүүдийг сонирхтол загвараасаа эхлээд дутмаг санагдсан. Товчхондоо энэ салбар маш ихээр хоцрогдож байгаа юм шиг санагдсанаа нуугаад яахав. Тэгээд л уралдаанч хүүхдийн өвөл зуны хувцаснаас эхлээд хурдан морины бүх төрлийн нэмнээг үйлдвэрлэхээр шийдсэн юм. Манайх хамгийн анхны размертай нэмнээг хийж зах зээлд нэвтрүүлсэн.
- Размертай...?
-Тийм. Хүний хувцас өндөр нам, биеийн жинд нь тохирсон стандарт размертай байдаг шиг морины нэмнээ ч ялгаагүй нас насанд нь зориулагдсан хэмжээтэй байх ёстой гэж үзсэн юм. Нэлээдгүй хугацаанд судалгаа хийгээд гаргасан загвараараа нэг нэмнээ хийгээд Өлзийт хороололд очиж моринд нөмрүүлж үздэг. Хүмүүстэй нь зөвлөдөг. Ингэж хэд хэдэн удаа туршсаны эцэст загвар материалаа тодорхойлсон. Манай нэмнээнүүд гоёлын, бэлэг дурсгалын, борооны, нарны, хөлсний гэх мэтчилэн нэлээд олон төрөл. Өвлийнх нэмнээ гэхэд л агаар солилцдог хэрнээ чийгтэж цан цохихгүй. Тэгээд дээр нь нас болгонд зориулагдсан размертай. Бид дан ганц нэмнээ гэлтгүй хурдан моринд зориулсан элгэвч, хүзүүвч, зоовчийг өнгөний өргөн сонголттойгоор үйлдвэрлэж байгаа.
-Сүүлний шуулт, магнайвч хүртэл хийдэг юм билээ?
-Тиймээ. Сүүлний шуулт, медаль зүүдэг магнайвч зэргийг мөн үйлдвэрлэдэг. Өнөө жил бид гоёлын нэмнээнийхээ загварыг өөрчлөхөөр шийдсэн. Яагаад гэхээр одоогийн бидний хэрэглэж байгаа нэмнээ түрүүлж, айрагдсан бахархалт хүлгүүдийн маань хамаг үзэсгэлэнтэй, сайхан чанаруудыг нь хаачихдаг дутагдалтай учраас түүнийг нь засахаар шийдсэн. Загвар нь батлагдчихсан. Тун удахгүй шинэ загварын гоёлын нэмнээнүүд худалдаанд гарах байхаа.
-Уралдаанч хүүхдийн хувцсыг тань харсан. Хамаагүй биетэй юм билээ?
-Баяр наадам зохион байгуулах комиссын захиалгаар АХ-ын 95 жилийн ой улсын баяр наадамд түрүүлж айрагдсан морьдын нэмнээ, уралдаанч хүүхдүүдийн хувцсыг манай компани үйлдвэрлэсэн. Бидэнд санал тавьж хамтран ажилласан зохион байгуулах комиссын гишүүн дараа нь над руу яриад сэтгэл хангалуун байгаагаа илэрхийлж “Ерөнхийлөгч уралдаанч хүүхдүүдэд бэлэг гардуулах болгондоо ямар гоё хувцастай хүүхдүүд вэ?” гэж хэлснийг уламжилсан. Бид уралдаанч хүүхдийн хувцсыг хийхээсээ өмнө бусад бүтээгдэхүүнийхээ нэгэн адил тодорхой тандалт судалгаа явуулсан. Морь унахаар их хэмжээний хөлс ялгардаг, заримдаа тэр нь арьсыг нь түлж гэмтээх ч тохиолдол байдаг гэнэ. Үүнийг тооцож үзсэн. Мөн бороо, салхи гэх мэт байгалийн хүчин зүйлүүдийн нөлөөг тооцож, сэмрэлт агшилт багатай, сайн чанарын материал байх нь зүйтэй гэж үзсэн юм. Дээр нь спорт учраас хүүхдүүдийн ханцуй нь 180 градус нээгддэг, өмдний суудал нь моринд мордох, буухад тээргүй байхаар тооцоолж, үндэсний уламжлалт шинж чанарыг тусгахыг эрмэлзсэн. Өвлийн хувцасны тухайд нано дотортой, маш хөнгөн, угааж цэвэрлэхэд хялбар, дээр нь ямар нэг эрсдэл гарлаа гэхэд төвөггүй танигдахаар тод өнгөтэй байх нь зүйтэй хэмээн үзсэн.
-Хадлан загварын дээл, аяны хөнжил, ангийн хувцас хэрэгсэл гээд Flames-ийн бүтээгдэхүүнүүд эрэлт ихтэй байна лээ. Манай редакци руу хүртэл холбогдож лавласан. Өргөн сонголттой чөлөөт зах зээлд ийн байр сууриа бэхжүүлэх бас ч амаргүй байх шүү. Та бүхэнд баяр хүргэе?
-Бид ганцхан Flames гээд онцгойрох гээд байгаа юм биш. Ер нь монгол хүн чадна гэдгийг л харуулахыг зорьсон.Түүндээ хүрч чадаж байгаадаа баяртай байдаг. Flames брэндийн бүтээгдэхүүнүүд зах зээлд хүлээн зөвшөөрөгдөж хэрэглэгчдийн талархлыг хүлээж буй нь бахархууштай. Энэ бол монголчууд бие биенийгээ дэмжиж байгаагийн бас нэгэн жишээ юм. Анхны бүтээгдэхүүн дээрээ логогоо тавихад зарим нэг нь тавихгүй байж болох уу гэж асуудаг байсан бол одоо өөр газар нь ахиад тавьж болохуу гэж асуудаг болж. Энэ бол үндэсний үйлдвэрлэл гэхээр чанар муутай, биед суултгүй, эдэлгээгүй байдаг гэсэн таагүй ташаа ойлголтыг үгүйсгэж чадсаны баталгаа. Энэ бол манай компанийн үндэсний үйлдвэрлэлдээ оруулж буй том хөрөнгө оруулалт.
-Санал нэг байна. Flames-ийн дараагийн зорилго юу вэ?
-Монгол брэндийг дэлхийд хүлээн зөвшөөрүүлэх. Үүний төлөө хичээж ажиллах болноо.
-Ойрхон санагдаж байна. Та бүхэнд ажлын амжилт хүсье.
-За баярлалаа.

"Тод магнай" сэтгүүл